കോടതി ഉത്തരവ് ലംഘിച്ച് നിലം നികത്തി പാർക്കിംഗ്: എഴുപുന്നയിൽ ‘ഇവ് കൺവെൻഷൻ സെന്റർ’ക്കെതിരെ ഗുരുതര ആരോപണം.

ആലപ്പുഴ:  എഴുപുന്ന വില്ലേജിൽ പ്രവർത്തിക്കുന്ന ‘ഇവ് കൺവെൻഷൻ സെന്റർ’ (Eve Convention Center) സംബന്ധിച്ച് ഗുരുതരമായ നിയമലംഘനാരോപണങ്ങൾ ഉയരുന്നു. കൺവെൻഷൻ സെന്ററിന് ആവശ്യമായ അധിക പാർക്കിംഗ് സൗകര്യം ഒരുക്കുന്നതിനായി സമീപത്തെ പാടശേഖര ഭൂമി നിയമവിരുദ്ധമായി നികത്തിയെന്നാണ് പ്രധാന ആരോപണം. വിൻസെന്റ് എന്ന വ്യക്തിയുടെ ഉടമസ്ഥതയിലുള്ള ഈ സ്ഥാപനത്തിന് വേണ്ടി കൃഷിയോഗ്യമായ നിലവും വെള്ളക്കെട്ട് പ്രദേശവും ഉൾപ്പെടുന്ന ഭൂമി വാങ്ങി നികത്തിയതായാണ് പ്രദേശവാസികൾ ആരോപിക്കുന്നത്.

ഈ വിഷയത്തിൽ ബിജു.ആർ എന്ന വ്യക്തി നിരവധി തവണ പഞ്ചായത്ത്, കൃഷി വകുപ്പ്, ജില്ലാ കളക്ടർ എന്നിവർക്കു മുന്നിൽ പരാതികൾ സമർപ്പിച്ചിട്ടും യാതൊരു ഫലപ്രദമായ നടപടിയും ഉണ്ടായില്ലെന്നതാണ് പരാതി. തുടർന്ന് വിഷയത്തിൽ ഇടപെടൽ ആവശ്യപ്പെട്ട് ഹൈക്കോടതിയെ സമീപിച്ച ബിജു, WP(C) No. 47553/2025 എന്ന റിറ്റ് ഹർജി സമർപ്പിച്ചു.

2026 ജനുവരി 6-ന് ബഹുമാനപ്പെട്ട ഹൈക്കോടതി ജസ്റ്റിസ് പി.വി. കുഞ്ഞികൃഷ്ണൻ വിധി പ്രസ്താവിച്ചു. പരാതിയിൽ ഉന്നയിച്ച വിഷയങ്ങൾ പരിഗണിച്ച് രണ്ടാം പ്രതിയായ ജില്ലാ കളക്ടർ, പരാതിക്കാരനും മറ്റ് ബന്ധപ്പെട്ടവർക്കും വാദവാദങ്ങൾ കേൾക്കാനുള്ള അവസരം നൽകിക്കൊണ്ട്, രണ്ട് മാസത്തിനുള്ളിൽ വിഷയത്തിൽ അന്തിമ തീരുമാനം എടുക്കണമെന്ന് കോടതി നിർദ്ദേശിച്ചു.

എന്നാൽ കോടതി നിർദ്ദേശം പുറപ്പെടുവിച്ചിട്ട് മാസങ്ങൾ കഴിഞ്ഞിട്ടും, നികത്തിയ ഭൂമി പഴയ നിലയിലാക്കുകയോ, നിയമവിരുദ്ധമായ ഇടപെടലുകൾക്കെതിരെ കാര്യമായ നടപടി സ്വീകരിക്കുകയോ ചെയ്തിട്ടില്ലെന്നാണ് ആരോപണം. ഇതോടെ കോടതി ഉത്തരവിനെ പോലും അവഗണിച്ചുകൊണ്ടുള്ള നടപടികളാണിതെന്ന വിമർശനം ശക്തമാകുകയാണ്.

കൂടാതെ, നിലവിലെ ചില ഉദ്യോഗസ്ഥരുടെ അനാസ്ഥയോ, അനുകൂല നിലപാടോ മൂലം നിയമലംഘനങ്ങൾ തുടരുകയാണെന്ന ഗുരുതര ആരോപണവും ഉയരുന്നുണ്ട്. പാടശേഖര ഭൂമി നികത്തൽ, കേരളത്തിലെ നിലവിലുള്ള പരിസ്ഥിതി-ഭൂമിയിടപാട് നിയമങ്ങൾ പ്രകാരം കർശനമായി നിയന്ത്രിക്കപ്പെട്ട വിഷയമാണ്. ഇത്തരത്തിൽ നിയമം ലംഘിച്ച് ഭൂമി മാറ്റം വരുത്തുന്നത് ക്രിമിനൽ നടപടികൾക്കു വഴിവെക്കുന്ന കാര്യമാണ്.

കോടതി നിർദ്ദേശങ്ങൾ പാലിക്കാത്തത് തന്നെ Contempt of Court നടപടികൾക്ക് വഴിയൊരുക്കുന്ന സാഹചര്യമാണ്. ഇതോടൊപ്പം ബന്ധപ്പെട്ട ഉദ്യോഗസ്ഥർക്കും സ്ഥാപന ഉടമയ്ക്കും എതിരായി ശക്തമായ നിയമനടപടികൾ ഉണ്ടാകാൻ സാധ്യതയുണ്ടെന്നാണ് നിയമ വിദഗ്ധരുടെ വിലയിരുത്തൽ.

എഴുപുന്ന മേഖലയിലെ പരിസ്ഥിതിയെയും ജലസമ്പത്തിനെയും ബാധിക്കുന്ന തരത്തിലുള്ള ഇത്തരം പ്രവർത്തനങ്ങൾക്കെതിരെ ശക്തമായ നടപടികൾ ഉടൻ ഉണ്ടാകണമെന്ന് നാട്ടുകാരും ആവശ്യപ്പെടുന്നു. കോടതി ഉത്തരവുകൾ പോലും അവഗണിക്കപ്പെടുന്ന ഈ സാഹചര്യത്തിൽ, ഭരണകൂടത്തിന്റെ ഇടപെടൽ എത്രയും പെട്ടെന്ന് ഉണ്ടായില്ലെങ്കിൽ ഇത് വലിയ നിയമ-പരിസ്ഥിതി പ്രതിസന്ധിയിലേക്ക് നയിക്കുമെന്ന ആശങ്ക ശക്തമാകുകയാണ്.