ആംബുലന്‍സ്​ പീഡനം: പ്രതിയുടെ ജാമ്യഹര്‍ജി തള്ളി

കൊച്ചി: കോവിഡ് ബാധിച്ച യുവതിയെ ആംബുലന്‍സില്‍ പീഡിപ്പിച്ച കേസിലെ പ്രതിയുടെ ജാമ്യഹര്‍ജി ഹൈകോടതി തള്ളി. പന്തളത്തെ ആശുപത്രിയിലേക്ക് കൊണ്ടുപോകും വഴി പീഡിപ്പിച്ചതിന്​ അറസ്​റ്റിലായ ആംബുലന്‍സ്​ ഡ്രൈവര്‍ കായംകുളം സ്വദേശി നൗഫലി​ന്‍റെ ജാമ്യഹര്‍ജിയാണ്​ ജസ്​റ്റിസ്​ വി.ജി. അരുണ്‍ തള്ളിയത്​. സുരക്ഷിതയെന്ന് കരുതി ആശുപത്രിയിലേക്ക് പോയ യുവതി പീഡിപ്പിക്കപ്പെട്ടത്​ സര്‍ക്കാറി​ന്‍റെ കോവിഡ് പ്രതിരോധ പ്രവര്‍ത്തനങ്ങളെപ്പോലും പ്രതികൂലമായി ബാധിച്ച സംഭവമാണെന്നും ഈ ക്രൂരത ആരെയും ഞെട്ടിക്കുന്നതാണെന്നും വിലയിരുത്തിയാണ്​ ഹര്‍ജി തള്ളിയത്​. സെപ്റ്റംബര്‍ അഞ്ചിന് രാത്രി പതിനൊന്നരയോടെ നടന്ന സംഭവത്തില്‍ തൊട്ടടുത്ത ദിവസംതന്നെ പ്രതിയെ അറസ്​റ്റ്​​ ചെയ്​തിരുന്നു.

അന്വേഷണം പൂര്‍ത്തിയായ സാഹചര്യത്തില്‍ കസ്റ്റഡിയിൽ തുടരേണ്ടതില്ലെന്നും ജാമ്യം നല്‍കണമെന്നുമായിരുന്നു ഹര്‍ജിക്കാര​ന്‍റെ ആവശ്യം. എന്നാല്‍, യുവതി ശാരീരികവും മാനസികവുമായി തളര്‍ന്നതും സംഭവത്തെത്തുടര്‍ന്ന് വ്യാപക പ്രതിഷേധം ഉയര്‍ന്നതും കണ്ടില്ലെന്ന് നടിക്കാന്‍ കഴിയില്ലെന്ന്​ കോടതി ചൂണ്ടിക്കാട്ടി. ജാമ്യഹര്‍ജി പത്തനംതിട്ട സെഷന്‍സ് കോടതി തള്ളിയിരുന്നു.